klinger.jpg (5541 Byte)

Dr Wawrschustergung 

Walter Klinger drzehlt.

zusammengestellt von Helmut Mürling

Der Autor Walter Klinger ist in Neudorf b. Sebastiansberg im Erzgebirge geboren und in dem kleinen Dorf "Zollhaus" aufgewachsen. Seine Kindheit ist geprägt durch die kargen Gegebenheiten des Gebirges und der kleinbäuerlichen Elternhauses. Neben dem Schulbesuch in Krima und in der Kreisstadt Komotau war er von früher Jugend an in den bäuerlichen Arbeitsrhythmus des Jahres eingebunden. Der Inhalt der Kurzgeschichten ist selbsterlebte Wirklichkeit, vorwiegend aus dem Lebensabschnitt zwischen 4. und 15. Lebensjahr. Seine Erzählungen sind ausschließlich in jener erzgebirgischen Mundart verfaßt, wie sie in weiterem Umkreis von Neudorf  gesprochen wurde. Sie können damit als Munartdokumente gelten. Darüber hinaus vermitteln sie auch ein Spiegelbild der damaligen sozialen Verhältnisse im mittleren , oberen Erzgebirge. Walter Klinger hat      2 Kinder und 1 Enkelkind.

Lassen wir nun den Wawrschustergung selber erzählen:
Die Geschichte handelt von dem schönen erzgebirgischen Osterbrauch Aufpeitschen.

"Ruute, ruute Eier raus !"

Dr Ustersunntich, dos is fier de Buum e schlimmer Tooch. `S aanzieche, wosse derfn: in dr Kerch giehe. E wos onners derfn se net. Se derfn noch net aufpeitschn giehe, se derfn net dorch de Pfitzn laafn, net iewer Greem springe, sich nerchets oolahne, net ewu naufkraxln, net ewu neikriechn, net ewu nunnerspringe, net hieflieng, net hiesetzn, net hieleeng- nischt derfn se, iewerhaupt nischt! Un dos ner waang dann neie Ooziezeich! "Desde dich jo net dracket mochst, du mußt fei morgn drmiet aufpeitschn giehe!" dos schreit de Mutter jedsmol nooch, wenn dr Gung nausgieht. Dann gonzn longe Ustersunntich när immerfort sauwer bleim un drauf wortn, deß mr om Ustermoontich aufpeitschn gieh koo, dos wor fei enne Tortuur!

Owr wie om onnern Tooch frieh de Sunn emm dr Schustrfronzschei remmguckt un in senn Kommerfanster scheint, springt dr Gung mit ann Satz ausn Bett un rennt nonner in dr Stuub. Benn Assn rutschtr om Stuhl uugeduldich hie un har, wurgst e Stick Usterlaabl nei un schlurft de haaße Millich ausn Tippl. Nu springtr auf, gropscht nooch dr Aufpeitschrut, noochn Kuuptichl, wos iewerkreiz zu enn Eiersckl zommgebundn is, un well naus. Do derwischtn de Mutter grod noch afn Fliegl, ziehtn zerick un schimpft: "su koste net remlaafn, wie sihste dä aus? Wos solln dä Leit denkn ? Do muß mr sich jo schaame! Stell dich do hie!" un se fängt uum oo, kämmt de Hoor nochemool iewer senn Reckl, zieht seine longe Strimp nochemol nauf un schiebts Strumpband hecher, zieht oo seine korzn Huusn, deße aa e tichtichs Stick unner de Knie ronnergiehe, knebert de Schuhbnnl auf, un zieht se fest un bindt en doppltn Knuutn. Noochert dreht se ne Gung e poormol immedimm, gucktn vu uum bis untm oo un soocht endlich: "Su, itze siste schie aus, nu koste giehe. Owr renn fei net dorch de Pfitzn un lahn dich nerchets oo !" Dr Gung rofft Eiersckl un Aufpeitschrut zomm, sterzt ofn Huf naus, des de Hiehner mit lautn Gegocker ausenonnerflattern, kriecht kaum de Dreh zun Huftierl naus un rennt zun Kreiz nauf, wu de Zollheiser Buum zun Aufpeitschn zommkumme.

aufpeitschen.JPG (35204 Byte)

"Aufpeitschen".

von Adolf Sachs
Weil se weit laafn missn, fonge se gleich oo. Se renne ne holprichn Steig nonner in Tool un mochn oo de zwaa Bernhardinerhind vorbei in dr Holzmiehl nei. Se renne aa nuch nunner zu dr Braatmiehl un zerick un wieder ne steil Barch nauf. Nu kloppern se ne Hondvull Heiser in Zollhaus oo. Se kumme mit "Fruhe Ustern" zu dr Tier nei, wockln e bißl mit ihren Ruttn un soong ihr Sprichl auf: "Ruute, ruute Eier raus, peitsch mr eire Maadln aus, wenn mr kaane Madln hot, peitsch mer ihne salwr aus." Bis ze Mittich kenne se aufpeitschn, owr imme zahne sei se mit ihre poor Heiser schie fertich. Do leern se drhamm ihre Eiertichln aus un mochn nemm of dr "Spitz". Se beneindn drbei de Neiderfer un de Krimer Buum. " Dort sei su viel Heiser, die braung när longsom vu ann zun onnern ze ziehe, do hom se ze Mittich enn gruußn Haufn Eier wegschnoppn kenne.!" Nu laafn se noch forscher, mochn gonz longe Schriet un monnichsmol renne se e Stick. Do flottern de Maschn wie bunte Schmetterling emm ihre Kepp, de schinn Tichln schwinge auf un nieder, un dronner bießln eiliche, zoppliche Kinnerbaa. Dos sieht racht lustich aus!
Beim Wachterhaus giehe se vorbei, dort wohnt e Tschech, erst of dr "Spitz" peitschn se auf. Owr viel Leit sei do aa net, un su komme se gschwind zun Bittner un noochert zun Boohuuf, wu eingtlich leuter Tschechn wohne. Owr dr Vodder hot gestern gemaant: "Naa, dos stimmt net, gitt när emool in dr Restorazion, dort is dr Reichmoo Jus drauf, dos is e Deitscher." Se dränge sich dorch dr huuche Restorazzionstier, bleim schichtern stiehe, guckn af de grußn Lompn oo dr Deck, guckn of de huuchn Fanster, of Tiesch un Stiehl un de Leit, wos do sitzn. Oo dr Wond sahe se enn grußn Schronk mit viel Glos un viel vrschiedene Floschn drenne, om Schonktisch sei gruße un klaane Gleeser, un drhinner stieht e Moo mit enn freindlichn Gsicht, dar redt se oo: " Na Kinner kommt när e Stickl wedder har un soocht mr wosser wellt!" Do troppln de Buum hie, fuchtln mit ihre Ruttn iewern Schonktisch niewr un vrlonge: "Ruute ,ruute Eier raus...!" Dr Reichmoo Jus greift henner sich un longt fier jedn Gung enne gruße Pomeronz iewern Tiesch un aa noch drei Schokeladneier fier jedn. Do glänzt de Freid in ihre Aang, se fiehln sich reich beschenkt, un mit enn Dorchenonner vu "Donk schie", "Grieß Gott" un Schuhgetroppl schiem se sich widder zu dr Tier naus. Draußn bewunnern se ihre Pomeranz, schnuppern droo, drickn se oo de Bockn, tunne su, ols welltn se neibeißn, freie sich wie dr Hans im Glick un maane, deß dr Reichmoo net när esuu haaßt, naa, dos is aa werklich e gonz reicher Moo.
Itze renne se aa noch of Neidorf, fonge benn Loodnhanl oo, giehe in Dorf nonner, schwinge iewroll ihre Rutt un leiern ihr Sprichl. Om Gemaawaag komme se in enner Stub, wu de Fraa schie de Knedlschissl un de Aßtller ofn Tiesch stellt. Do merkn se, deßes Mittich sei muß. Se welln owr net auhärn un probierns nochemool in onnern Haus. Dort sitzn de Leit schie um ne Tiesch remm un leffln ihre Supp. Elle heem se ihre Kepp un guckn mit gruße Aang of de Kinner in dr Tier. En Fraa spring auf, steckt ihne noch e Aai in ihrn Tichl un soocht: "Na ihr seid woll heit ze speet aufgstondn, wos?" Dann Wink vrstieht se, härn mit Aufpeitschn auf, ziehe mit ihre schwern Eiersackln benn Rimpl- Schuster vorbei nauf of dr Strooß un giehe hamm.
Wosse benn Aufpeitschn drlabbt homm. dos blett fei hänge. Dremm homm se speter, wie se gruß worn, ne klann Bossn immer gerootn: "Vrgaßt när jo net ne Reichmoo Jus in dr Restrazzion om Boohuuf, dar schenkt eich goldene Pomeronzn un drzu viel Schukeladneier.